IntroduciónKCachegrind é un navegador dos datos de perfilado producidos por ferramentas de perfilado/tracexamento. Este capítulo explica para que serve o perfilado, como se fai, e dará algúns exemplos das ferramentas de perfilado disponíbeis.
Cando se desenvolve un programa, un dos últimos pasos a miúdo son as optimizacións do rendimento. Xa que non ten sentido optimizar funcións que sexan raramente usadas, porque sería unha perda de tempo, é preciso saber que partes do programa son usadas a maior parte do tempo.
Para o código secuencial, polo xeral é abondo recoller datos estatísticos das características de execución do programa, como o tempo gastado en cada función e as liñas de código. Isto é chamado "Perfilado". O programa é executado baixo a supervisión dunha ferramenta de perfilado, que dá un resumo dunha execución. En contraste, no código paralelo os problemas de rendimento polo xeral teñen a súa orixe en que un procesador está a esperar datos de outro. Xa que polo xeral non é facil coñecer a orixe deste tempo de espera, neste caso é mellor xerar trazas de eventos con selo temporal. KCachegrind non pode visualizar este tipo de datos.
Tras analisar os datos de perfilado producidos, debera ser sinxelo ver os pontos críticos e pescozos de botella do código: por exemplo, poden comprobarse suposicións acerca do número de chamadas, e optimizar as rexións identificadas como críticas no código. Tras isto, a eficacia das optimizacións debe ser verificada con outro perfilado.